კომპანია Samsung Electronics-ი შემოსავლების მკვეთრი ზრდის ეტაპზე გადადის. ანალიტიკოსების პროგნოზით, კომპანიის მიერ წარმოებული მეხსიერების ჩიპების მთლიანი მარაგი 2027 წლამდე სრულად გაიყიდება. ამ პროცესის მთავარი მამოძრავებელი ძალა ხელოვნურ ინტელექტზე (AI) მკვეთრად გაზრდილი მოთხოვნა და ბაზარზე მიწოდების შეზღუდული შესაძლებლობებია.
KB Securities-ის ანგარიშის მიხედვით, DRAM და NAND ტიპის მეხსიერების ბაზარზე დეფიციტური მდგომარეობა კიდევ რამდენიმე წელი შენარჩუნდება. მოსალოდნელია ფასების მნიშვნელოვანი ზრდაც: ვარაუდობენ, რომ 2026 წელს DRAM-ის ფასი 148%-ით, ხოლო NAND-ის – 111%-ით მოიმატებს. არსებული ვითარების გამო, მსხვილი ტექნოლოგიური კომპანიები უკვე ცდილობენ Samsung-თან 5-წლიანი კონტრაქტების გაფორმებას, რათა ჩიპების მიწოდება 2030 წლამდე დაიზღვიონ.
კომპანიის ფინანსური მოლოდინები საგრძნობლად გაუმჯობესდა. პროგნოზის თანახმად, 2026 წლის მხოლოდ პირველ კვარტალში Samsung-ის საოპერაციო მოგებამ შესაძლოა 40 ტრილიონ ვონს მიაღწიოს, რაც იმაზე მეტია, ვიდრე კომპანიის მთლიანი მოგება მთელი 2025 წლის განმავლობაში. მოთხოვნის სტრუქტურულ ზრდას ასევე ხელს უწყობს ხელოვნური ინტელექტის დანერგვა რობოტექნიკასა და ავტონომიურ ტრანსპორტში, რაც მეხსიერების ჩიპებზე მოთხოვნას მომდევნო ათწლეულის განმავლობაშიც შეინარჩუნებს.
წყარო: Investing.com
