ტექნოლოგიურმა კომპანიამ Oracle-მა ოთხშაბათს გამოქვეყნებულ დოკუმენტში განაცხადა, რომ მისი წილი TikTok-ის ამერიკულ ოპერაციებში დაახლოებით 2 მილიარდ დოლარად არის შეფასებული. ინფორმაცია მას შემდეგ გახდა ცნობილი, რაც პლატფორმის ჩინურმა მშობელმა კომპანიამ ByteDance-მა დაასრულა შეთანხმება, რომლის შედეგადაც აშშ-ში ახალი ერთობლივი კომპანია შეიქმნა, რათა TikTok-ს შესაძლო აკრძალვა აეცილებინა.
შეთანხმების მიხედვით, ახალ კომპანიაში, TikTok USDS Joint Venture LLC, ამერიკელი და საერთაშორისო ინვესტორები ერთად 80.1%-იან წილს ფლობენ, ხოლო ByteDance-ს 19.9% დარჩა. ერთობლივი საწარმოს სამი მთავარი ინვესტორი Oracle, საინვესტიციო კომპანია Silver Lake და აბუ დაბიში დაფუძნებული ფირმა MGX – თითოეული დაახლოებით 15%-იან წილს აკონტროლებს.
კომპანიის აღმასრულებელ დირექტორად იანვარში დაინიშნა ადამ პრესერი.
ეს შეთანხმება მნიშვნელოვანი ეტაპი გახდა TikTok-ისთვის, რომლის გარშემოც დაპირისპირება ჯერ კიდევ 2020 წელს დაიწყო, როდესაც მაშინდელი პრეზიდენტი დონალდ ტრამპი ეროვნული უსაფრთხოების მიზეზით პლატფორმის აკრძალვას ცდილობდა. მოგვიანებით აშშ-ში მიიღეს კანონი, რომელიც ByteDance-ს ავალდებულებდა TikTok-ის ამერიკული აქტივები 2025 წლის იანვრამდე გაეყიდა, წინააღმდეგ შემთხვევაში აპლიკაციას აკრძალვა დაემუქრებოდა.
ამავე დროს, Oracle-მა განაცხადა, რომ ხელოვნური ინტელექტის მონაცემთა ცენტრების სწრაფი ზრდა კომპანიას შემოსავლების ზრდაში დაეხმარება. კომპანიის ინფორმაციით, 2026 წლის 28 თებერვალს დასრულებულ მესამე კვარტალში Oracle-ის შემოსავალმა 17.19 მილიარდ დოლარს მიაღწია, რაც ანალიტიკოსების პროგნოზს, 16.91 მილიარდ დოლარს, აღემატება.
