2026 წლის პირველივე თვე ხელოვნური ინტელექტის (AI) აქციებისთვის მოულოდნელი ცვლილებებითა და მაღალი არასტაბილურობით დაიწყო. გასული წლისგან განსხვავებით, დღეს ბაზარზე სრულიად ახალი სურათი იკვეთება. მიმდინარე პერიოდი გარდამტეხია ინვესტორებისთვის, რადგან ისინი ყურადღებით აკვირდებიან ისეთი გიგანტების ანგარიშებს, როგორიცაა Meta, Microsoft და Nvidia, რათა გაიგონ, რამდენად ამართლებს AI ინფრასტრუქტურაში ჩადებული უზარმაზარი ინვესტიციები.
ბაზრის მთავარი ტენდენცია აპარატურული უზრუნველყოფის (Hardware) მწარმოებლების უპირატესობაა პროგრამული უზრუნველყოფის (Software) კომპანიებთან შედარებით. განსაკუთრებით გამორჩეულია მეხსიერების ჩიპების მწარმოებელი Micron Technology, რომლის აქციები 2026 წლის იანვარში 45%-ით გაიზარდა. ანალიტიკოსები აღნიშნავენ, რომ AI აქსელერატორების ბაზარზე მოთხოვნა მათ პრაქტიკულ გამოყენებაზე, ანუ “ინფერენსინგზე” (Inferencing) გადადის. სწორედ ამ სფეროში ცდილობს AMD სერიოზული კონკურენცია გაუწიოს Nvidia-ს, რამაც მისი აქციების 10%-იანი ზრდა განაპირობა. რაც შეეხება თავად Nvidia-ს, მისი პოზიციები სტაბილურია (იანვარში +2%), თუმცა ინვესტორები ელიან შემდეგი თაობის „Vera Rubin“ აქსელერატორების წარმოების დაწყებას.
საპირისპირო ვითარებაა პროგრამული უზრუნველყოფის სექტორში. ბევრი კომპანიის აქციები მკვეთრად დაეცა იმ საშიშროების გამო, რომ ისეთი გიგანტები, როგორიცაა OpenAI და Anthropic, პირდაპირ კონკურენტებად იქცევიან.
ასევე, თუ ხელოვნური ინტელექტი პროდუქტიულობას ისე გაზრდის, რომ სამუშაო ადგილების შემცირებას გამოიწვევს, ეს პირდაპირ დაარტყამს პროგრამული კომპანიების შემოსავლებს. ამის მაგალითია Palantir-ის (-18%) და Snowflake-ის (-12%) აქციების ვარდნა იანვარში. განსაკუთრებით მტკივნეული აღმოჩნდა Anthropic-ის მიერ „Cowork“ ინსტრუმენტების გამოშვება Shopify-ისთვის, რომლის აქციებიც 18%-ით გაუფასურდა.
ბაზარზე სულ უფრო ხშირად ისმის კითხვები AI „საპნის ბუშტის“ შესახებ, რომელიც შეიძლება მალე “გასკდეს”. ინვესტორების შეშფოთებას რამდენიმე ფაქტორი იწვევს: უზარმაზარი ვალები – ტექნოლოგიური კომპანიები მონაცემთა ცენტრების ასაშენებლად მასიურ ვალებს იღებენ; ინფრასტრუქტურის ამორტიზაცია – ძვირადღირებული აპარატურა დროთა განმავლობაში ფასს კარგავს, რაც უარყოფითად აისახება კომპანიების მოგებაზე; ენერგოპრობლემები – AI მონაცემთა ცენტრების უზარმაზარი მოთხოვნა ელექტროენერგიაზე აშშ-ის ელექტროქსელს დიდ დატვირთვას აყენებს, რაც ჩინეთთან შედარებით ჩამორჩენის რისკებსა და სამომხმარებლო ტარიფების ზრდას იწვევს.
მიუხედავად იმისა, რომ Meta Platforms (+9% იანვარში) აჩვენებს, რომ AI ინვესტიციებს რეკლამიდან უკუგება მოაქვს, საერთო სურათი მაინც ფრთხილია. ინვესტორებს მართებთ მეტი დაკვირვება იმ კომპანიების მიმართ, რომლებიც AI-ს სტრატეგიული უპირატესობის მოსაპოვებლად რეალურად იყენებენ და არა მხოლოდ მარკეტინგული მიზნებისთვის.
წყარო: Yahoo Finance
