ჩინეთმა 2025 წელს რეკორდულად მაღალი, თითქმის 1.2 ტრილიონი დოლარის მოცულობის სავაჭრო პროფიციტი დააფიქსირა, რაც ძირითადად აშშ-ის გარეთა ბაზრებზე ექსპორტის მკვეთრმა ზრდამ განაპირობა. მონაცემები ოთხშაბათს გამოქვეყნდა და ასახავს ჩინელი მწარმოებლების გაფართოვების მცდელობას, აშშ-ის ადმინისტრაციის მხრიდან მზარდი ზეწოლის საპასუხოდ.
ექსპორტის ზრდა განსაკუთრებით შესამჩნევი იყო სამხრეთ-აღმოსავლეთ აზიაში, აფრიკასა და ლათინურ ამერიკაში, სადაც ჩინურმა კომპანიებმა გააძლიერეს პოზიციები. ანალიტიკოსების შეფასებით, ეს სტრატეგია ჩინეთის ეკონომიკისთვის ეფექტიანი აღმოჩნდა და ნაწილობრივ შეამსუბუქა აშშ-ის ტარიფების გავლენა.
„ჩინეთის ეკონომიკა უკიდურესად კონკურენტუნარიანია,“ – განაცხადა ფრედ ნოიმანმა, HSBC-ის აზიის მთავარმა ეკონომისტმა. მისი თქმით, ეს კონკურენტუნარიანობა ნაწილობრივ განპირობებულია პროდუქტიულობის ზრდითა და ჩინელი მწარმოებლების ტექნოლოგიური წინსვლით, თუმცა ეს აგრეთვე ასახავს სუსტი შიდა მოთხოვნისა და ჭარბი წარმოების პრობლემას.
უკვე 2025 წლის ბოლოს, პეკინის წინაშე არაერთი გამოწვევა გამოჩნდა. მათ შორისაა მზარდი უკმაყოფილება საერთაშორისო პარტნიორების მხრიდან ჩინეთის სავაჭრო პრაქტიკის და ჭარბი წარმოების გამო.
პოლიტიკურ ანალიტიკოსებს უჩნდებათ ასეთი კითხვა: რამდენ ხანს შეძლებს ჩინეთის 19 ტრილიონი დოლარის ეკონომიკა სუსტი შიდა მოთხოვნისა და შიდა უძრავი ქონების კრიზისის კომპენსირებას, უცხოურ ბაზრებზე უფრო იაფი საქონლის ექსპორტით?
„ჩინეთის მზარდმა სავაჭრო პროფიციტმა შესაძლოა გაამწვავოს დაძაბულობა სავაჭრო პარტნიორებთან, განსაკუთრებით იმ ქვეყნებთან, რომლებიც თავადაც წარმოებაზე და ექსპორტზე არიან დამოკიდებული,“ – აღნიშნა ნოიმანმა.
